ASUL NGA MGA LANGIT

Thursday, March 24, 2016

ASUL NGA MGA LANGIT

ang mamingaw ug bililhon nga kahaponon nakighinabi sa walay   imik  nga  mga  langit nakighuhabilo sa nahabiling kahayag  sa adlaw kung  sa diin  ang mga  kasakit  nga  akong gihambin  naalim

ikatandi kini sa agianan sa mga anghel samtang giganoy sila paingon  sa mga naglakbay  nga mga panganod

ang pagkamakuntintohon ningpahid sa walay tingog kong mga  luha sa  dili  matukib nakong  mga  kalipay samtang gibatbat  ko  ang  mga  panid  sa mga hunghong  sa  akong kalag

pagkaanindot ning  maong  talan awon..pagkabulahan ning akong mga  mata  nga  nakasaksi niining  maong  gasa  sa kinaiyahan nga  gitagaan  akog higayon  sa  pagdayeg  ning matahom  nga  kalibutan

samtang  ako  nagpaanod  sa hangkat  sa  kinabuhi ubos ning matahom  ug  asul  nga  mga langit..

PAG-INUSARA

Sunday, October 18, 2015

PAG-INUSARA

Pag-inusara...

Kangitngit  sa  palibot ubos  sa kahilakon  nga mga  langit

Sa matag  karon  ug unya  ang dag-om  mohadla  paglakbit

Ngano nga sa nagaligiting kainit sa  adlaw sa  kalit  lamang

Gitabunan mo ang kahayag nianang asul  nga  kalangitan

Dinhi  akong nasabtan  nga  walay kanunay  niining  kalibotan

Hayag  man  ning  akong  nataran apan  mangitngit  sa unahan

Wala akoy mahimo gawas sa pagpadailos lamang  sa kapalaran

Ug sa mabugnaw nga kagabhion magahangad sa mga  bitoon

Ug igo  lamang  akong mangandoy sa  ilang  kamaadanihon

Sa  mamingaw  nga  kagabhion maginusara kong  tagamtamon

Ang akong kaugalingon nga puno sa matam-is nga mga pahiyom..

DAKTOL

Tuesday, September 8, 2015

DAKTOL

Daktol...

Pakaanindot sa imong  kahayag
di matukib sa mga  simple ug
mga yano kong mga pulong

Sa mga managhigugmaay ang imong banaag maoy saksi sa ilang matam-is nga hulongihong

Gitagamtam ang panagsaong huyohoy  sa hangin niining  romantikong kagabhi-on

Apan  ngano  ba? Unsay  hinungdan sa lumba  sa mga  lusok sa akong  mga  luha?

Aduna  bay  kasakitan nga akong gihambin? Dili  naku masabtan ug  unsa  kining  mga  kulba..

Basin nahadlok lg  ako  sa  mga uwang  ning mabugnawng  gabii sa ngi-ob nga kadalanan?

O nahasi  ba hinuon sa nag-alindasay nga  mga kalag nga  ninghamok  sa akong galamhan

Ngano nga ang  akong  pagsalig ninglurang ug  nagdumili?

Nganong  magpadala  ako  sa mga lamat  ning  kinabuhi?

Kalimtan ko na lg ba ang  naghimo  ning  bulan nga  bisan ang dagat  mahimo Niyang  mabaktas?

Pagkatahom sa mensahe  nga  dala  sa maong daktol.. Ang  mga  pag-antos ato lg diay nga malat-as

Sa  pagpaubos  kita nakakat-on
 Sa bahandi  sa  kaalam  Iya  kitang  giayo pag-umol

Sama sa bulan  nagsugod sa gamay  nga  kahayag  ug  nahimo  kining  Daktol...

DINAGAYDAY DA TUBIG

Sunday, May 31, 2015

DINAYGAYDAY SA TUBIG

Sa akong madasigong paglakbay
Paingon sa sandayong nagdagayday

Sa tubig magtagbaw akong pangindahay

Gihandom bation ang tumang kahayahay

Sa akong paghulom sa mga buswak
Sa iyahang kinaiyahang dinahili

Sa panit kung uhaw ningdapat
ang matag bul-og nga way pagdumili

O madigayaong tubig, mahimo bang
mosuhop ka sa kinauyokang bahin sa akong dughan?

Mahimo ba nga pukawon mo ang nahikatulog kong kasingkasing sa iyang kanailadman?

Ayaw imakuli kanaku ang silaw sa banaag

Kuhaig kusog ang mga butang nakababag

Nga unta ipatagamtam mo kanako
Ang bidlisiw nga walay katapusan

Sama sa maalamon nga kalag 

ug espiritung puno sa tumang kinaadman

O masaganahon ug mapagarbohong tubig

Kaanindot sa mabugnaw nimo nga talsik

Ang imong kanaas sama sa hunghong 

nga makaalim sa akong mga kasakit

Dagaydayi akog kusog nga makigbatok

 sa unsa man nga hangkat sa ugma

Pakatuloga ug papahulaya 

ang nag-alindasay kong kabalaka

O tubig nga nagdagayday
Pagkatam-is mangindahay