MGA TINAGAKTAK SA ULAN

   Mga tinagaktak sa ulan    

 

Kusog kayo ang bundak sa ulan sa sayo nga kagabhion

Nanumbalik kanako ang handurawan sa kabatan-on

Nga sa diin ikaw ang kanunay nako nga ginahandom

Kumusta ka na? Susama ba ang mga gibati ta karon?

 

Nahinumdom ka ba sa mga ulan nga atong gitamasa?

Hilabihan natong gipugngan ang  bul-og sa mga luha

Kabalaka ang nagpatigbabaw sa atong mga hunahuna

Dili nato madawat kung kita pagabulagon ni Bathala

 

Apan napakyas ang tanan natong mga gipangandoy

Ang atong mga palad wala nakig-uyon  sa huyuhoy

Sa mga katuigan nga nanglabay, unsa ang ng asoy?

Asa ka man sa mga nangaging panahon nga misutoy?

 

Sa mga nanglabayng mga takna, imo bang gikalimtan?

Mga panaad natong duha imo na lg bang gipasagdan?

Apan ngano ang akong kasingkasing dili ka matalikdan

Unsa ba kining gibati, kanimo nagapos akong dughan

 

Unta madungog mo ang kusog nga mga tinagaktak  ulan

Ug makita mo ang akong panagway sa imong galamhan

Bati-on mo ang katim-os sa gugma sa akong handurawan

Tagamtamon mo sa imong galamhan, gugmang hilabihan

 

HANGKAT SA KINABUHI

 Hangkat sa Kinabuhi

Pagkayamig sa panahon niining mga taknaa

Buot akong maglukob lg maghapon sa kama

Apan aduna koy obligasyong paga-atubangon

Di nako gustong sayangon ang akong panahon

Ning kalibutan grasya sa kinabuhi pasalamatan

Dili nato mapugngan kg kanus-a kita motaliwan

Busa samtang buhi pa ta himoon nato ang tanan

Pahimuslan nato ang hangin nga atong hinulman

Apan dili kita matulin sa pagsalig sa kaugalingon

Kita binuhat lg sa atong Diyos nga Makagagahom

Ang tanan isalig nato Kaniya, atong Magbubuhat

Kay sa Iyang gingharian, Siya kanato nagahulat

Gikapoy ka na ba igsoon sa hangkat sa kinabuhi?

Nga sa atong pakigbisog, kapalaran nagdumili

Gipangutana mo ba ang atong Diyos, ug ngano?

Nga gipakatawo ta, unsa man ang Iyang plano?

Pagkalisod tubagon ning maong mga tanghaga

Pagkangitngit, kinahanglan ta'g banaag ni Bathala

Kung atoa kining palaluman dili nato matugkad

Magmumugna, pagsalig nga hugot, among ihalad

Igsoon, himo-a ang puno sa katakos mong kaayo

Lingia ang mga kalag nga nangaluya na pag-ayo

Adunay gipihigan sa ilang mga panginahanglan

Buhata unsa ang imong mahimo sa kaigsoonan

Dili man kita tul-id ug walay mga mantsa sa sala

Apan di babag nga di kita magpabanaag sa suga

Matag kasingkasing adunay nagpahipi nga kasidlak

Ablihi ang pultahan, ipakita ang gugmang nagbusilak

Sa matag pagkadagma, motindog kita ug mosikad

Di nato ibali ang mga hapdos nga garas sa samad

Dili baya nga ang tanan nga nahagbong, ningtiklaob

Pahiyom kay sa imong pagkapiang adunay mohilot

Abiabihon ang kalisod samtang kita nagaginhawa pa

Kay kini nagtimailhan sa kinabuhi kita adunay grasya

Ihangad ang ulo sa langit, tim-os nga magpasalamat

Palambo-a ang langitnong kaalam nga Iyang gihatag

~Helen Sarita